---

Ytri Rangá

Staðsetning: Suðurland, 100 km frá Reykjavík. Ytri Rangá rennur í gegnum Hellu.

Veiðisvæði: Frá mörkum neðan Djúpósnefs að og með Árbæjarfossi, en ofar að og með Ármótahyl í ágúst og sept. Í ágúst og september er Guttlfoss með.

Stangarfjöldi:
16 stangir 2. júlí – 10. Júlí
18 stangir frá 10. júlí - 24. júlí
20 stangir 24. júlí - 20. okt

Tímabil: 24. júní–20. okt. 2012

Daglegur veiðitími: 7–13 og 16–22 (23. jún.–15. ág.) 7–13 og 15–21 (15. ág. – 30 sept). 8-20 heill dagur 12 klst dagur (30 sept -20 okt.)

Veiði 2007: 6.377 laxar
Veiði 2008: 14.315 laxar
Veiði 2009: 10.749 laxar
Veiði 2010: 6.210 laxar
Veiði 2011: 4.961 laxar

Meðalvigt: 8 pund

Leyfilegt agn: Fluga, maðkur og spónn.

Eingöngu fluga frá eftir hádegi 10. júlí til fyrir hádegi 29. ágúst.

Veiðitæki: Tvíhenda 13-15”, lína 9-11. Mælt er með sökktaum.

Bestu flugur: Sunray Shadow, Snælda, Colly dog, Black & Blue og Frances, Black Ghost.

Veiðivörður: Matthías Þorsteinsson s: 842-5559

Staðhættir og aðgengi: Aðgengi víðast mjög gott.

Veiðikort: Hægt að nálgast á www.agn.is

Veiðibók: Liggur frammi í húsi veiðifélagsins norðan við gistiskálana við bæinn Rangá.
Veiðimönnum er skylt að skrá allan afla daglega. Tilkynna ber merkta fiska til umsjónarmanns.

Sími í veiðihúsi: Rangá s. 487 5720.

Bókanir og nánari upplýsingar:
Stefán Sigurðsson, skrifstofa Lax-á, s: 531 6100 eða stefan@lax-a.is
Netsala smella hér

Veiðihús: Sumarið 2011 var unnið að viðbyggingu við veiðihúsið þar sem matsalur og setustofa voru stækkuð og öll aðstaða veiðimanna stórbætt. Við hjá Lax-á erum afar stolt hvernig tókst til og hlökkum til að bjóða veiðimönnum uppá glæsilegt veiðihús og góða þjónustu næsta sumar.

Nýr matsalur í viðbyggingunni með útsýni yfir ána

Ytri-Rangá -Veiðistaðalýsing

Svæði 1

Fyrsta svæðið í ánni er í Hólsá frá Borg að ca. 1 km að ármótum Ytri og Þverár. Á svæði eitt eru fjórir veiðistaðir merktir (1-4) og eru þeir misgjöfulir frá degi til dags en reyna má við þá alla. Til að komast að svæði 1 frá veiðihúsinu er ekið niður með ánni og beygt til vinstri 12-13km neðar þar sem skilti Hólsá og Ástarbraut eru. Sá slóði er svo ekinn og kemur að ánni á móts við veiðistaðinn Staurinn nr.4  og er ekið niður með ánni að veiðistöðum 3, 2, og 1 Borg.

                Veiðistaðurinn Borg einkennist af álum í botninum sem geta verið mismunandi eftir árum en Ytri Rangá er þekkt fyrir að breytast yfir vetrarmánuðina vegna mikils sands og vikurs í botninum. Best er að veiða þessa ála með að kasta yfir þá  og venda línunni eins og hægt er til að hægja  á reki flugunar, gott er að byrja frá landi en vaða svo aðeins út.  Yfirleitt veiðist best í Ytri Rangá með þessari aðferð þar sem laxinn tekur oftast fluguna á rekinu. Hægt er að veiða þessa ála sum árin alveg niður að mörkum Ytri og Hólsar en eins og áður segir eru þeir breytilegir milli ára.

                Næsti veiðistaður sem vert er að prófa er Þvottaplanið en hann er eins og Borg breytilegur og ýmist veiðist vel eitt árið en getur svo dottið út annað árið en þess virði að prófa ef tími gefst til. Lax getur haldið sig þar nálægt landi.

Fyrir ofan Þvottaplanið er svo Straumey en sá veiðistaður gaf 267 laxa sumarið 2011. Best er veiða Straumey með því að vaða út í efri enda eyjunnar og ganga hana að ca. miðju eða við móts við merkið á hinum bakkanum og kasta í áttina að landi en laxinn getur verið alveg upp við bakkann. Er svo veitt niður að enda eyjunnar og veitt niður.

Staurinn er veiðistaðurinn sem tekur svo við af Straumey og jafnframt efsti veiðistaður á svæði eitt. Staurinn getur haldið mikið af laxi, sérstaklega fyrri part sumar en til að komast að veiðistaðnum er keyrt yfir sleppitjörnina fyrir ofan Straumey og að rafmagnsstaurnum. Þegar mikið er af laxi er gott að byrja að veiða útfrá staurnum og veiða sig niður en aðal tökusstaðurinn er þó 20-30 metrum neðar. Eins og áður er best að byrja að kasta frá landi áður en vaðið er útí á.

 

Svæði 2

Á svæði tvö eru sjö merktir veiðistaðir (5-12). Fyrsti veiðistaður er Djúpósnef svo kemur Djúpós og janframt aflahæsti veiðistaður síðustu ára á svæðinu. Til að komast að veiðstaðnum frá veiðihúsi er afleggjari tekinn til vinstri um 10km neðar en best er að átta sig á veginum að veiðstað á minnisvarðanum sem er á flóðgarðinum miðjum.

Djúpós var einn af aflahæstu veiðistöðum í Ytri Rangá lengi en hefur verið slakari síðustu ár en á þó alltaf sína spretti á hverjum sumri. Best er veiðin þegar lax er að ganga en Djúpós getur haldið mikið af laxi þegar góð ganga fer í gegn. Oft er hægt að sjá þegar lax rennir sér inn í hylinn en hann afar djúpur og liggur alveg upp að flóðgarðinum. Oft vaða menn út hjá klakkistunni fyrir ofan hylinn og kasta út í þar sem hann byrjar og vinna sig niður að garðinum. Þar er haldið áfram efst í garðinum og kastað ca. 6 – 7 metra út frá bakka en mikilvægt er aðvera duglegur að venda línunni  og veiða djúpt þegar veitt er niður. Er svo veitt niður að minnisvarðanum sem er littlu neðar og greinilegur.

Línustrengur er fyrir ofan Djúpós og gott er að reyna ef tími gefst til. Hann tekur nafn sitt augljóslega af háspennulínu sem þverar ána efst í veiðistaðnum en hægt er að keyra alveg upp að staurnum en er annars einungis nokkra mínútu gangur frá Djúpós. Gott er að vaða hann beint út af háspennustaurnum og byrja þar efst en veiða sig svo niður allan moldargarðinn sem liggur niður með ánni. Línustrengur getur geymt mikið af laxi og er hann oftar en ekki að stökkva þar. Einnig veiðist stundum ofar í eystri strengnum sem sameinast landstraumnum við háspennulínuna.

Eru þetta helstu veiðistaðir á svæði tvö en ef tími gefst til má reyna Hólmabreiðuna og Húsabakka sem eru ofar og nær endamörkum á svæðinu.

 

Svæði 3

                Á svæði þrjú eru sjö merktir veiðistaðir (12-17B) og er gott að reyna fyrst við veiðistaðinn Hrafntóftir, þar neðar er Bankabreiða en áður fyrr var hann albesti veiðistaður í Ytri Rangá og gat gefið þriðjung veiðinar í ánni þegar hann var uppá sitt besta. Neðan Bankabreiðu er Breiðabakki og gefur hann oft á tíðum fiska. Afleggjarinn að veiðistöðunum er litlu neðar en bærinn Hrafntóftir en hann er um 5km frá veiðishúsinu. Gallinn við veiðistaðina er sá að vegna vikurs og sands í botninum eru þeir aldrei er eins milli ára. Síðastliðinn tvö ár hefur besta veiðin verið 30 metrum ofan og neðan bakka sleppitjarnarinnar. Hrafntóftirnar mega samt eiga það að þær hafa alltaf verið gjöfular.

Gunnugilsbreiða 16 er næsti veiðistaður fyrir ofan Hrafntóftir. Smá spölur er þarna á milli og keyra menn yfirleitt að 17B Nýja Gunnugilsbreiða.  Veiðisvæðið er á hægri hönd við bílastæðin og er vaðið útí hólma en hann er veiddur frá enda og niður hólmann ca. 40 metra.

17a er besti veiðistaðurinn á þessu svæði síðastliðinn ár en hann gaf 414 laxa sumarið 2011. Hann er þó ekki merktur veiðistaður á veiðikorti Ytri Rangá en hann uppgötvaðist ekki fyrr en 2008. Staðurinn, sem er við skilin á svæði þrjú og fjögur,  hefur einnig verið nefndur Jóhannesarbreiða í höfuðið á Jóhannesi Hinrikssyni leiðsögumanni sem uppgötvaði veiðistaðinn þegar hann sá lax bylta sér beint fyrir neðan Neðrahorn á svæði 4. Best er að byrja að veiða við skiltið sem skilur að svæðin og niður eftir breiðunni alveg niður fyrir Sandhólana sem eru um 200 metra neðar en tökustaðir geta verið ýmsum stöðum í breiðunni.

 

Svæði 4

                Um svæði fjögur má segja að sé einn samfeldur góður veiðistaður, allt frá Ægissíðufossi og niður fyrir Neðrahorn, en alls eru þetta þrír veiðistaðir (18, 21-22) .  Austurbakkinn (19-20) er yfirleitt látinn fylgja öðrum svæðum og er það tilgreint á svæðaskiptingarblöðum sem afhent eru eftir drátt. Til að komast á svæði fjögur er beygt niður afleggjara merktan Ægissíðufossi en hann er um 3km frá veiðihúsi þegar keyrt er niður Þykkvabæjarveginn. Frá bílastæðinu þarf að labba stuttan spöl niður í gilið.

Neðrahorn & Klöppin eru fyrstu veiðistaðirnir liggja saman og mynda einn skemmtilegasta veiðistaðinn í ánni. Þegar veitt er á Klöppinni er mikilvægt að vaða sem minnst og helst ekkert því laxinn þarna er styggur en laxinn getur verið alveg við landið. Gott er að byrja 100 metra fyrir ofan Klöppina sem sést augljóslega úti miðri á og vinna sig alveg niður fyrir Neðrahorn. Oft hefur reynst vel að nota litlar flugur og strippa hratt inn því mikið fjör er á laxinum á þessum stað og geta þeir tekið hver á fætur öðrum.

Ægissíðufoss er án efa einn af fallegri veiðistöðum landsins og tekur við af Klöppinni. Í Ægissíðufossinum er teljari og laxastigi og er hægt að sjá laxana hreinlega bíða í biðröð eftir því að fara stigann. Yfirleitt er byrjað að veiða um 5 metrum fyrir neðan foss og veitt niður í átt að Klöppinni. Margir veiðimenn fá góða veiði þegar þeir vaða 2 metra útfrá stærsta trénu sem er 60 metra neðan Ægissíðufoss  og kasta útá breiðuna og venda línuna og láta hana reka alveg að landi en þar liggur oft lax.  Ægissíðufossinn er straumharður og mikilsfenglegur og því gott að nota þunga hraðsökkvandi tauma.

 

Svæði 5

Svæði fimm er eitt af skemmtilegustu svæðunum í Ytri Rangá þó að svæðið sé ekki það gjöfulasta en þar eru sjö merktir veiðistaðir (23-29). Þarna skiptir áin sér í tvennt áður fyrir ofan Ægissíðufoss og er frábært einhendu svæði. Aflahæstu veiðistaðirnir eru Hornið, en þar stoppar lax eftir að hafa farið upp fossinn, Svartistakkur, Reyrhólmi og Kvíslapollar. Árbugur, Bugstrengir og Kerið gefa alltaf einn og einn. Mælt er með að ganga allt veiðisvæðið og kasta á álitlega staði því oft á tíðum fást laxar á ómerktum veiðistöðum. Ef tími gefst er gott að ganga svæðið aftur því laxinn er á göngu í gegnum svæðið og gæti verið mættur á veiðistaðina. Til að komast að veiðistöðunum er best að annaðhvort leggja hjá bílastæðinu að Ægissíðufossi og byrja á Horninu eða að leggja fyrir neðan Veiðihúsið og byrja á Kvíslarpollunum.

 

Svæði 6

                Á svæði sex eru fjórir merktir veiðistaðir(30-33). Fyrsti veiðistaður á svæði sex er einn skemmtilegasti og eftirsóttasti veiðistaðurinn í ánni en það eru Rangárflúðirnar sem eru fyrir neðan Veiðihús Ytri Rangá. Flúðirnar bera vel tvær stangir og eru veiddar bæði af austur- og vesturbakkanum. Þegar veitt er austanmeginn er vaðið yfir ána og er þá miðað við norðurenda veiðihúsins þegar vaðið er yfir. Ber þó að varast að áin getur breytt sér milli ára og þar með vaðið og er mælst með að fá upplýsingar hjá yfirleiðsögumanni eða veiðiverði hvar sé best að vaða. Gott er að kasta niður að broti um leið og vaðið er yfir því lax getur haldið sig bakvið brotið, sérstaklega ef það er búið að kasta mikið á breiðuna fyrir neðan brot. Þegar á austurbakkan er komið er hægt að veiða beint af bakkanum eða vaða 2-4 metra út og kasta út á breiðu. Þegar Rangárflúðirnar eru veiddar af vesturbakkanum er gott að byrja að veiða af bakkanum áður en vaðið er útá brotið, en laxinn getur verið nálægt landi eða jafnvel alveg upp við bakkann. Þegar vaðið er og veitt er útfrá brotinu er kastað fyrir neðan það og útá breiðu.

                Gaddstaðabreiða er litlu ofar en Rangárflúðir og er hún veidd af austurbakkanum. Er þá vaðið yfir fyrir ofan Rangárflúðir. Best er að byrja að veiða ámóts við enda eyjunnar sem er útí miðri á og vinna sig niður að Rangárflúðunum.

 

Svæði 7

                Á svæði 7 eru fimm merktir veiðistaðir (34-39) en helstu veiðistaðir eru Tjarnabreiða og Hellisey. Til að komast að veiðstöðunum frá veiðihúsinu er ekið til hægri og aftur til hægri uppá þjóðveg. Ekið er stuttur spotti og beygt niður til hægri áður en farið er yfir brúnna en Hellisey er fyrsti veiðistaður hjá brúnni en Tjarnabreiður neðar.

                Tjarnabreiðu er hægt að veiða á tvo vegu. Fyrst má veiða frá landi og byrja þar sem vatn rennur úr sleppitjörn og í ána. Þar er svo bakkinn veiddur niður eftir og alveg að svæða mörkum sex og sjö. Önnur leið er svo að vaða útí ána fyrir ofan rennslið úr sleppitjörninni og kasta svo í átt að landi þannig að flugan skelli bakkanum en lax heldur sig alveg upp við landið. Tjarnabreiðan er þó frábrugðin flestum öðrum stöðum í Ytri Rangá að ekki þarf að veiða mjög djúpt og því er betra að nota þyngdar túpur eða létta sökkenda.

                Hellisey er eins og áður segir fyrsti veiðistaður við bílastæðin hjá brúnni og byrja veiðimenn vanalega að veiða þennan veiðistað beint útfrá bílastæðunum. Þaðan er veitt niður bakkann og kastað í átt að eyjunni en neðrihluti eyjarinnar er helsti tökustaðurinn á staðnum.

 

Svæði 8

                Svæði átta er með þrjá merkta veiðistaði (40-42) og er misgott eftir árum en hefur stundum gefið góða veiði og þá helst veiðistaðurinn Stallmýrarfljót. Svæðið er fyrir ofan brú og er veitt af vesturbakkanum.

Heiðarbrún. Þegar ekið er að veiðistaðnum frá veiðihúsi er farið upp á þjóðveg og beigt til vinstri í átt að Reykjavík og svo strax aftur til hægri upp Árbæjarveg. Sá afleggjari er ekinn upp um kílómeter og þar beygt til hægri áður en komið er að bænum Heiðarbrún. Vegurinn er keyrður útá enda og svo gengið smá spöl niður að veiðistaðnum. Heiðarbrún er langur og lygn veiðistaður og gefur stundum góða veiði síðsumars. Best er að veiða af vesturbakkanum og byrja efst þar sem hann er merktur og vinna sig niður. Er þá kastað frá bakka áður en vaðið er út því lax getur haldið sig við árbakkann. Eins og áður er línan venduð eftir fremsta megni eftir kastið.

Stallmýrarfljót er einsog áður segir besti veiðistaðurinn á svæði átta. Til að komast að staðnum er farið sömu leið og á Heiðarbrún en ekið lengra og beygt til hægri rétt fyrir neðan Árbæjarhjáleigu. Er sá vegur svo ekinn niður að sleppitjörn sem er við veiðistaðinn en þar getur safnast töluvert af laxi. Best er að byrja ofarlega eða rétt fyrir ofan sleppitjörnina og labba rólega og kasta alveg niður með hylnum sem er þó nokkuð langur. Einnig er hægt að vaða útí eyju sem er í miðri ánni, er þá best að vaða frá sleppitjörn og að norðurenda eyjarinnar. Frá eyjunni er svo veitt frá enda og niður en gott er að vaða aðeins út til að ná yfir á bakkann hinum meginn en laxinn getur verið alveg upp við land. Best er að nota tvíhendu ef vaðið er út í eyju.

 

Svæði 9

                Svæði níu er frábrugðið flestum öðrum veiðistöðum en þar er best að veiða frá austurbakkanum. Til að komast á efra svæðið frá veiðihúsinu er ekið upp að þjóðvegi og beygt til hægri í gegnum Hellu. Afleggjari að Gunnarsholti er tekinn til vinstri (Rangárvallavegur) og hann keyrður um kílómeter áður en beygt er til vinstri. Sá slóði er ekinn um annan kílómeter og beygt aftur fyrstu beygju til vinstri til að komast að Árbæjarkvísl en næsti vegur tekinn til að komast að Árbæjarfossi og Árbæjarbreiðu.  Hann er svo keyrður nokkur hundruð metra og beygt aftur til vinstri og sá slóði ekin til enda.

Árbæjarkvísl er best veidd frá austurbakkanum. Oft gefur kvíslinn góða veiði en þó verið döpur síðustu ár. Best er að byrja að veiða kvíslina mitt á milli bílastæðanna og árinnar og veiða sig svo niður eftir að klakkistunum en besti tökustaðurinn er rétt við kistunar.

Árbæjarfoss er einnig veiddur frá austurbakka en best er að veiða með hraðsökkvandi enda og þungar túpur og kasta útí hvítfyssið. Það er svo veitt aðeins niður úr.

Árbæjarbreiðu er hægt að veiða vestanmeginn en hefur yfirleitt gefið betri veiði af austurbakkanum. Til að byrja með er breiðan djúp en svo grynnir við endann. Oft heldur lax sig við grunna endan en vert er að byrja að dýpri breiðuna einnig.

 

Svæði 10

                Svæði tíu er með þrjá merkta veiðistaði (47-50) og eru þeir fyrir ofan Árbæjarfoss og ofan Gutlfoss. Það sama gildir á svæði tíu og níu að best er að veiða frá austurbakkanum. Til að komast á veiðistaðina er farið sömu leið og á svæði níu nema ekið aðeins lengra vegaslóðan frá Rangarvallavegi. Helstu veiðistaðirnir eru Mælabreiða og Gutlfossbreiða.

                Mælabreiða er fyrir ofan laxastigann í Árbæjarfossi. Hún er best veidd frá broti um 200 metra fyrir ofan stiga og svo veidd niður 150 metra. Helsti tökustaðurinn er þó nær laxastiganum þar sem lax hvílir sig eftir átökin.

Gutlfossbreiða er veidd eins og Mælabreiða að mörguleiti. Þar er best að fara rétt fyrir ofan sleppitjörnina sem er ámóti bílastæðunum og veiða sig svo niður eftir. Lax heldur sig meðfram bakkanum alla leið niður að laxastiga Gutlfoss. Gott er að byrja að veiða frá bakkanum og láta fluguna reka alveg að bakkanum áður en vaðið er útí. Hér eins og allstaðar annarstaðar í Ytri Rangá skiptir máli að venda línuna eins og hægt er. 

Til baka Senda grein Prenta greinina