Krossá í Bitrufirði

Krossá í Bitrufirði er lítil 2ja stanga laxveiðiá sem gefur að jafnaði í kringum 100 laxa á sumri, en sumarið 2010 gaf þessi magnaða á rúmlega 160 laxa veiði.

Veiðisvæðið er um 8 kílómetrar að lengd, með 22 merktum veiðistöðum, nánara frá Svartfossi niður að Neðri Brú. Ágætis veiðihús fylgir Krossá sem er með 2 svefnherbergjum og tveimur svefnloftum svo það er nóg pláss í húsinu. Gasgrill er á staðnum og öll helstu eldhúsáhöld ásamt ískáp, eldhúshellum ofl.

^{Í sumum hyljum getur safnast gríðarlegt magn af laxi.}

Í Krossá er leyfilegt að veiða með flugu og maðk frá 1. júli til 20. júlí og er hámarkskvóti 2 laxar per stöng per dag, eftir það má eingöngu veiða og sleppa noti menn flugu. Eftir 20. júlí er eingöngu leyfilegt að veiða með flugu og daglegur kvóti áfram 2 laxar á dag. Einnig eru veiðimenn beðnir um að sleppa öllum stórlaxi.

Þessi ráðstöfun er gerð í samvinnu með landeigendum - enda er þeim afar annt um þess fallegu litlu á.

Krossá er blátær og hægt að sjá laxinn í mörgum hyljum, en fara verður varlega, laxinn er styggur í þessu litla tæra vatni.

^{Víða eru kjöraðstæður fyrir gárutúbuna}

^{Laglegur septemberlax}

Veiðihúsið er rúmgott og notalegt.

_{^{Veiðihúsið er notalegt og vistlegt}}

Staðsetning: Bitrufjörður, Mitt á milli Staðarskála og Hólmavíkur, um 250 km frá Reykjavík. Hólmavík er í um 40. mín akstursfjarlægð.

Veiðisvæði: Geysifallegt og nær frá Svartfossi niður að Neðri Brú en þar gætir sjávarfalla.

Stangarfjöldi: 2 stangir í senn, Seldir eru 2 eða 3 dagar saman.

Tímabil: 1. júlí til 20. september.

Daglegur veiðitími: 7–13 og 16–22 (30. jún. – 15. ág.) 7–13 og 15–21 (15. ág. – 20. sept.)

Leyfilegt agn: 1.júlí - 20.júlí Fluga og maðkur. 21.júlí - 20.sept Eingöngu fluguveiði. Kvóti 2 laxár á stöng.

Veiðitæki: Einhenda, lína 5-8.

Veiði 2011: 76 laxar
Veiði 2010: 162 laxar
Veiði 2009: 99 laxar
Veiði 2008: 82 laxar

Bestu flugur: Gárutúbur, Frances, Microtúbur og Collie Dog.

Staðhættir og aðgengi: Nokkuð gott aðgengi, bílfært að flestum stöðum 

Veiðihús: Veiðihúsið er rúmgott og snyrtilegt með svefnpláss fyrir 9 manns á tveimur svefnloftum og tveimur herbergjum með efri og neðri koju hvort. Í kringum veiðihúsi er fín verönd og í húsinu er gasgrill og frystikista. Gott kort er af veiðisvæðinu í húsinu en veiðistaðir eru 22 talsins. Hafa þarf með sér sæng/svefnpoka, handklæði, tuskur og viskastykki. Í húsinu næst ekki gsm samband.

Leiðarlýsing í veiðihúsið: Ekið er frá Reykjavík að Borganesi og þaðan yfir Holtavörðuheiði og að Staðarskála. Við Staðarskála er valin leiðin til Ísafjarðar/Hólmavíkur. (Vegur 68, var áður númer 61 og er merktur þannig á eldri kortum). Frá Staðarskála er um 50km akstur vestur í Bitrufjörð en þessi leið er að mestu malbikuð, en farið er framhjá Borðeyri og Hrútafjörður ekinn til enda og þá er komið í Bitrufjörð. Ekið er inn Bitrufjörð þar til komið er að skilti vinstra megin við veginn sem á stendur Krossárdalur, vegur nr 641. Veiðihúsið er um 5 km frá vegi 68 en Krossárdalurinn er ekinn sem leið liggur, yfir brú og framhjá bænum Gröf. Þá er næsti bær á hægri hönd Árdalur og þar beint á móti stendur veiðihúsið( hvítt með grænu þaki) við ána.

Umgegnisreglur: Veiðimenn mega koma í húsið 1 klst fyrir veiðitíma og skal húsið rýmt einni klst eftir að veiðitíma líkur. Munið að ræsta og hreinsa rusl.

Veiðikort: Er í veiðihúsinu.

Veiðibók: Er í veiðihúsinu.

Bókanir og nánari upplýsingar: Stefán Sigurðsson, skrifstofa Lax-á, s: 531 6100 eða stefan@lax-a.is  Netsala á www.agn.is