Silungs- og vorveiði í Tungufljóti

10.3.2010

Þann 1. apríl opna allmörg veiðisvæði hjá Lax-á eins og menn vita. Eitt þeirra er silungasvæðið í Tungufljóti. Veiðisvæðið sjálft er þó víðfeðmara en bara Tungufljótið, innan þessa svæðiðs eru einnig Laugaá, Beiná, Stekkjartúnsá og Almenningsá svo eitthvað sé nefnt. Svæðið nær frá skilti ofan við ármót Einholtslækjar og Tungufljóts og eins langt og fljótið og hliðarár þess ná.

Tungufljót

Veiðisvæðið er því ekki einungis gríðarstórt, heldur einnig ákaflega fjölbreítt. Almenningsá rennur í Tungufljót skammt neðan Geysis og hafa þau ármót verið gjöful undanfarin ár. Almenningsá er sjálf ágæt veiðiá og er af þokkalegri stærð, í hana renna síðan Laugá, Beiná og Stekkjartúnsá. Þessar minni ár eru mjög ólíkar Tungufljótinu og Almenningsánni, í þeim gildir að nota nettari græjur, veiða uppfyrir sig og fara varlega.

Stekkjartúnsá ofan þjóðvegar

Laugá er lítil og tær á sem rennur í Almenningsá aðeins fyrir neðan Geysi. Þar gildir að nota þurrflugur eða upstream – aðalatriðið er þó að fara varlega og styggja ekki fiskinn.

Laugá - lítil og nett

Beiná er lítil og nett á sem geymir furðulega mikið af vænum urriða, hið sama gildir þarna og í Laugánni, að fara varlega að ánni. Fari menn varlega og beri sig rétt að, geta menn átt von á góðum afla.

Ekki er komin mikil veiðireynsla á Stekkjartúnsána en líklegt er að henni svipi til Laugár og Beinár.

Einnig er vert að benda á að í gamla farvegi Tungufljóts, sem liggur samsíða Tungufljóti á 2ja kílómetra kafla fyrir neðan Biskupstungnabraut, renna nú Kjóastaðalækur og Brúarlækur og mynda ágætt og veiðilegt vatnsfall.

Í gamla farveginum, sem heitir víst Farvegur á kortum, hefur verið útbúin sleppitjörn og var sleppt í hana sumarið 2009. Það má því búast við að laxgengd aukist á silungasvæðinu í sumar.

Þeir veiðimenn sem við höfum heyrt í tjá okkur að mesta veiðina hafi þeir gert við ármót Almenningsár og Tungufljóts, og bæði upp og niður með Tungufljótinu við ármótin. Einnig veiðist vel við upp frá ármótunum í Almenningsá.

Einnig hafa menn gert fína veiði þar sem minni árnar renna í Almenningsána og í litlu ánum sjálfum.

Eins og sjá má er þetta veiðisvæði að mörgu leyti óskrifað blað, þó er vitað til þess að menn hafi gert góða veiði og veitt fallega fiska eins og sjá má á meðfylgjandi myndum.

Sjá má Geysis svæðið í baksýn

Laglegur urriði úr Tungufljótinu sjálfu

Laglegur 8 - 10 punda urriði

Stærsti urriði sem við heyrðum um í fyrra var um 13 pund og var tekinn í Tungufljótinu sjálfu. Veiðimenn sem svæðið stunda segja okkur að lykillinn að velgengni sé að fara sem víðast og prófa sem mest.

Svæðið opnar sem fyrr segir 1. apríl og er veiðikort í smíðum og verður vonandi tilbúið sem fyrst. Upplýsingar um laus leyfi og verð má finna á www.agn.is og er rétt að benda á að fyrsta vikan er á tilboði - 1.450 kr. dagurinn.

Stefán Páll Ágústsson spall@lax-a.is

Til baka Senda grein Prenta greinina