Sunray Shadow – Collie Dog.

24.12.2006

Sunray Shadow – Collie Dog.

Það eru allir vasar fullir af Sunray Shadow þegar ég fer til veiða, þetta er sú fluga / túba sem hefur gefið mér svo lagmest í gegnum minn veiðiferil, bæði hér heima á Íslandi og erlendis, þá sérstaklega í Skotlandi og Rússlandi. Það þarf að vinna með SS á mjög markvissan og sérstakan hátt. Vinnirðu rétt með túbuna þá bætirðu afla þinn verulega, ef ekki er unnið rétt með túbuna gefur hún nánast ekkert.  SS virkar best í litlu vatni þegar mikið er af laxi sem ekki tekur flugu, einnig í miðlungsháu vatni og í miklu vatni ef að hitastigið er gott, 8 gráður eða meira. Gott er að finna lax með SS, oftar en ekki kemur laxinn fyrst og skvettir sér á túbuna með ofsa látum en tekur hana ekki í fyrsta kasti, þá getur verið gott að skipta strax um og setja litla flugu undir og láta han reka þar sem laxinn kom upp á SS, oftar en ekki tekur laxinn strax litlu fluguna, nú ef ekki þá, skaltu strax setja SS aftur á og þá vinna hana á annan hátt yfir fiskinn, strippa hana hraðar eða hægar, meira þversum, upp á móti straumi..... á endanum er þetta allt of mikið áreiti fyrir laxinn og hann tekur með ofsafengnum hætti.  Oft kemur hann allur upp úr, þurrkar sig og tekur túbuna á leiðinni niður, þá er mikill hjartsláttur og óvanir veiðimenn kippa þá gjarnan túbunni snarlega frá laxinum, en þetta lærist.

Hvernig á að nota SS:

Lítið vatn mikið af laxi sem ekki tekur:

Kastaðu SS með flotlínu alveg þvert á strauminn / hylinn, bíddu í nokkar sekúndur þangað til að það er komin u laga bugt niður straum, þegar bugtin er orðin nokkuð mikil þá byrjarðu að strippa túbuna inn, þú byrjar hægt, eykur hraðann eftir því sem bugtin minnkar og þú verður að strippa inn túbuna alveg til þín nánast alveg að stangartoppi. Oft kemur sami laxinn í mörgum loftköstum á eftir túbunni í sama kastinu. Þú þarft að fara hratt yfir hylinn með SS, aldrei að endurtaka sama kast á sama stað nema að þú hafir fengið einhver viðbrögð.  Sérlega góð skilyrði fyrir SS er lítið vatn, mikið af laxi sem ekki tekur,  hávaði, rok og rökkur.  Þegar fer að kvölda er líka heitur tími fyrir SS. Áríðandi er að hafa margar stærðir og gerðir af SS, ef laxinn er mjög tregur, leginn og latur þá þarf að ögra honum með stórri útgáfu af SS, allt að 15 cm að lengd.  Eftir því sem túban er háralengri þarf að strippa hana hraðar.  Ef vatnið er mjög lítið þá er oft áhrifaríkt að kast SS vel upp á móti straumi.

Hvífriss og harðir strengir gefa oft illa á flugu, þetta er drauma svæði fyrir SS, þú getur togað upp lax á þessa ótrúlegu túbu úr nánast hvað frissholu sem er, eftir því sem straumrinn er meiri því minna strippar þú, ef að þú ert að veiða í ólgandi hvítfrissi og straumólgum þá stripparðu ekkert, lætur bara SS dangla ofaná frissinu.

Stundum er gott að hitcha SS, ef ekki virkar að að strippa túpuna yfir lata laxa, þá er oft gott að hitcha túbuna.  Þræða girnið í gegnum hliðina á plastbúknum, síðan strippa hana yfir laxinn og nú skal hún skauta vel þannig að það kemur falleg ákveðinn V straumröst á eftir túbunni, þetta fær enginn lax staðist.

Vorveiði með SS.

Fáir laxar mikið vatn ... en ekki svo kalt, besta flugan er aftur SS.  SS finnur fyrir þig laxinn, farðu hratt yfir, 1 skref fyrir hvert kast, ef lax er á svæðinu þá kemur hann á eftir túbunni, muna því meira vatn ... hægara stripp.

Hvernig á að strippa:

Langt, mjúkt en samt hratt, þetta er ein löng hreyfing, þú þarft að strippa heilan meter í senn, þú byrjar með hægri hendi alla leið upp að fyrstu lykkju á flugustönginni, dregur til þín i einni langri hreyfingu þar sem þú endar með hendina niður fyrir læri, síðan strax upp að lykkju aftur og niður fyrir læri og svo aftur og aftur þangað til að komið er að nýju kasti.

Mér hefur reynst best að hafa SS með engum auka litum, bara svarta geit og ekkert meir, kannski 2 strimla af glimmeri.  Margar útgáfur af SS eru allt of mikið klæddar, í ýmsum útgáfum með hvítu í, með peacock, fullt af glimmeri, ég kroppa þetta allt af og skil bara eftir svörtu geitina og tvö strá af glimmeri.

Smá veiðisaga í lokin:

Fáir vita um yfirburði SS.  Ég veiddi Tweed (Skotlandi) í október ásamt félaga mínum fyrir 2 árum, veiðisvæðið er kallað Lennel. Aldrei höfðum við veitt þetta svæði áður.  Þegar við komum og hittum Rocky, leiðsögumanninn okkar á fyrsta veiðidegi tjáði hann okkur að það væri mikið af laxi á öllu svæðinu, lítið vatn ... oohhh , Rocky sagði að eini möguleikinn að fá lax væri að veiða með agnarsmáum flugum og láta reka hægt. Við byrjum á stað sem heitir Crow, ... þar var lax að lyfta sér um allt, ég dreg upp SS og sýni Rocky og spyr hvort við eigum ekki að prufa þessa flugu núna ... svarið var .. “if you put this beast one I am off home, you will be blank for a week!” .. Ég krafðist að fá að prufa ... og að sjá svipinn á Rocky þegar við tókum 8 laxa í beit í fyrsta hylnum og lax á eftir flugunni í hverju kasti, við fengum á 4 dögum 64 laxa á 2 stangir og var það metveiði frá upphafi á þessu svæði.  Nú þarf ég að senda Rocky 10 kg af SS á hverju hausti!!!!

Árni Baldursson.

Til baka Senda grein Prenta greinina