Drápið á Stórlaxinum í Ölfusá og Hvítá heldur áfram.

24.5.2012

Enn eitt árið hefur stjórn Veiðifélags Árnesinga ákveðið að gefa Veiðimálastofnun langt nef með því að láta sem vind um eyru þjóta ákvörðun/ákall frá árinu 2010 um að öllum stórlaxi á Íslandi skuli hlíft, þar sem talið er að stofninn sé í mikilli hættu. Stangaveiðimenn og veiðifélög um allt land hafa þjappað sig saman og farið að fyrirmælum Veiðimálastofnunar og sleppt öllum laxi sem er 2 ára, eða yfir 70cm. Veiðifélag Árnesinga hefur nú 3 ár í röð þverskallast að fara eftir þessum fyrirmælum og hefur nú verið ákveðið að enn og aftur skuli leggja net um gjörvalla Ölfusá og Hvíta til höfuðs stórlaxinum, sem stendur mjög höllum fæti á vatnasvæðinu, og er á leið sinni upp á hrygningarstöðvar sínar í uppám Árnessýslu. Þetta hljómar fáránlega en er staðreyndin samt. Það litla sem sleppur svo frammhjá netunum  munum við stangaveiðimenn af veikum mætti reyna að halda lifi í þeim fáu stórlöxum sem rata á flugur okkar og sleppa aftur í ánna til að viðhalda storlaxastofninum sem er í algjörri útrýmingarhættu - viðhalda stofninum til þess eins að netaveiðimenn geta þá dundað sér við að drepa restina um ókominn ár.  Það sjá náttúrlega allir hugsandi menn hvurslags rugl þetta er. Að sjálfsögðu eiga netaveiðimenn að fara að ákvörðun Veiðimálstofnunar eins og aðrir og ekki að leggja net sín fyrr en mest af storlaxinum er farinn hjá. Einfalt er það; seinkið netaveiðitímanum um 2 vikur, og þá hafa netaveiðimenn lagt eithvað á vogarskálarnar til friðunar og uppbyggingar á stórlaxinum á svæðinu.

Hérna að neðan er tilkynning frá Forstjóra Veiðimálstofnunar frá 2010.

Forstjóri Veiðimálastofnunar segir, að veiðifélög landsins verði að taka til hendinni og banna alfarið stórlaxadráp. Verulega skorti á hjá sumum þeirra, að hafa sett sér slíkar reglur.

Sigurður Guðjónsson, forstjóri, segir á vef Veiðumálastofnunar, að ekki sé heldur nóg að hafa reglur heldur þurfi að ganga eftir því að eftir þeim sé farið.

„Í netaveiði er hægt að seinka veiðinni uns stórlax er gengin hjá og velja smálaxamöskva. Í stangveiði á veiðimaður ekki að þurfa að hafa samviskubit ef hann fer eftir þeim reglum, sem gilda í hverju veiðivatn," segir Sigurður.

Hann segir að nú sé undantekningarlaust í náttúrulegum veiðiám lagt til að stórlax sé ekki drepinn. „En þessi ferill gengur hægt, allt of hægt fyrir stórlaxinn, því var gripið til þess að senda út ákall í byrjun sumars um verndun stórlaxins. Það ætti ekki að vera erfitt að hlífa stórlaxi nú þegar afburða góð veiði er alls staðar og nægan smálax að hafa vilji menn lax í soðið," segir Sigurður.

Árni Baldursson

Til baka Senda grein Prenta greinina