Helstu fréttir
Fimm ára veiðibann á svartfugl
Á vef Umhverfisráðuneytisins kemur fram að starfshópur, skipaður af Svandísi Svavarsdóttir umhverfisráðherra um verndun og endurreisn svartfuglsstofna, leggi til að friða fimm tegundir sjófugla af svartfuglsætt. Þetta á við allar veiðar og nýtingu næstu fimm árin, þ.m.t. um eggjatínslu. Þessar fimm tegundir svartfugla eru álka, langvía, stuttnefja, lundi og teista. Í skýrslunni leggur starfshópurinn áherslu á að hér við land sé einn stofn af hverri þessara tegunda þannig að staðbundin áhrif og breytingar hafa áhrif á um allt land og á viðkomandi stofn hér við land.
Er þetta byggt á mælingum sem sýna árlega fækkun álku um 20%, langvíu 7% á ári og stuttnefja um 24%. Viðverandi viðkomubrestur hefur verið á lundastofninum í nokkur ár eða 75% en algjört hrun var í varpi hans 2011, nema á Norðurlandi hjá um 20% af stofninum.
Helsta orsök fyrir hnignun þessara stofna að mati starfshópsins er fæðuskortur og leggur því hópurinn til að tímabundið bann við veiðum og nýtingu muni flýta fyrir endurreisn þeirra. Auk veiðibanns leggur hópurinn til að breyting verði gerð á veiðikortinu, m.a. þannig að veiðikort þyrfti til allrar nýtingu villtra fugla, m.a. eggjatínslu. Að bann við skotveiðum við fuglabjörg verði fært úr 500 metrum í 2000 metra fjarlægð frá björgunum. Einnig að endurbæta veiðiskýrslur svo ítarlegri upplýsingar fáist um eðli og umfang nýtingar og að taka upp samstarf við sjávarútvegs- og lanbúnaðarráðherra um að draga úr fugladauða við fiskveiðar.
Starfshópurinn var skipaður af fulltrúum umhverfisráðuneytisins, Náttúrufræðistofnunar, Umhverfisstofnunar, Bændasamtaka Íslands, Skotveiðifélag Íslands og Fuglaverndar. Skotvís og Umhverfisstofnun skiluðu séráliti um friðun álku, langvíu og stuttnefju um takmörkun á veiði þeirra næstu fimm árin í stað algjörrar friðunar. Fulltrúi Bændasamtaka Íslands sagði sig frá tillögum starfshópsins.
Tekið af vef Umhverfisráðuneytisins.
.JPG)
.jpg)
