Helstu fréttir
Blöndufréttir júní 2010
Ég var að fletta í gegnum Blöndufréttir í júní í fyrra og má segja að það hafi kveikt á veiðineistanum, en hér fyrir neðan ætla ég að smella nokkrum fréttum frá því í fyrrasumar úr Blöndu.
5.6.2010
Laxveiðin í Blöndu hófst með pomp og prakt í morgun. Eins og undanfarin ár voru Stefán Sigurðsson og Tóti Tönn með í för og því ekki að spyrja að því að veiðin sé góð enda hörkuveiðimenn þar á ferð. Þeir sáu laxa í gærkvöldi skríða inn í damminn og hljóðið var gott í þeim þegar ég kíkti á þá í gær. En að veiðinni í morgun.. Það eru komnir 12 laxar á land, allir á bilinu 10-14 pund, sannkölluð Risaopnun og í raun frábært framhald af metsumrinu í fyrra, við munu fylgjast vel með og láta lesendur vita um leið og eitthvað meira gerist..
5.6.2010
Blanda opnaði heldur betur með látum í morgun. Eftir fyrstu vakt voru 16 stórlaxar komnir á land, ýmist á flugu eða maðk. Fyrsti laxinn kom á land um 5 mínútur yfir 07:00 – líklega er það þá fyrsti lax þessa tímabils á landinu. Mun meira af laxi er á svæðinu en oft áður, og misstu þeir sem þarna eru við veiðar a.m.k. 5 í viðbót við þessa 16. A.m.k. einn þeirra sem sleit sig lausan var í kringum 20 pundin.
5.6.2010
Í lok opnunardags endaði Blanda með 22 laxa á land og allnokkra sem slitu eða losnaði úr. Sá stærsti var 90 cm langur.
6.6.2010
Ballið virðist ætla að halda áfram í Blöndu því í morgun komu upp 8 laxar, allir vænir, og því komir 30 laxar á fyrstu 3 vöktunum. Það þarf ekki að orðlengja um það hversu ánægðir veiðimenn eru þarna norðan heiða og líklegt má telja að í næsta holli verði einnig glaðir veiðimenn - því þetta er allt nýgenginn fiskur og ekkert lát er á ferskum löxum.
7.6.2010
Gleðilegan mokveiði-mánudag! Menn eru glaðir og bjartsýnin ræður ríkjum hér á bæ núna eftir líklega lang bestu opnunarhelgi Blöndu frá upphafi en komnir eru rúmlega 40 laxar!!! Rúmlega tíu mínútum eftir opnun veiddist sá fyrsti og boðaði það ekkert nema gott enda var alveg kjörið veður til veiða. Besta veiðin til þessa hefur verið í Damminum og Breiðan að norðan hefur verið að gefa vel af sér.
9.6.2010
Veiðin í Blöndu byrjaði allveg frábærlega og má segja að þetta hafi verið metopnun, góður gangur er enn í Blöndu en sl sólahringur gaf eina 10 stórlaxa, 3 í gærkvöldi og 7 í morgun, að sögn Helga Guðbrandsonar leiðsögumanns við Blöndu er allveg greinilegt að laxinn er að ganga og allir fiskar grálúsugir.
14.6.2010
Heilir og sælir kæru veiðimenn en nýjustu fréttir úr Blöndunni herma að heildartalan er orðin 85 laxar og er þá 100 laxa múrinn að nálgast óðfluga. Seinnivakt gærkvöldsins var einkar tilkomumikil en komu þá 12 vænir á land. Það mætti halda að það þyrfti að setja keðjur í hjólin því þessir risafiskar hafa verið að slíta línur hægri vinstri en menn hafa töluvert verið að missa þá. Það sýnir sig nú einna best á því að minnsta kosti einn veiðimaður setti í einn risa sem gerði sér nú lítið fyrir og sleit 40 punda línu!
18.6.2010
Mokið heldur áfram í Blöndu en samkvæmt nýjustu fréttum gaf síðasta holl af sér 30 laxa. Einnig fylgir sögunni að mennirnir hafi verið rólyndismenn miklir og allir mjög afslappaðir á bakkanum. Við erum komin langt yfir 100 laxa mörkin og er fjöldi laxa veiddur nú að slaga upp í hvorki meira né minna en 150 laxar!
22.6.2010
Veiðin gengur allveg frábærlega í Blöndu en nú er Blanda að verða kominn í 250 laxa en Blanda opnaði 5 júni sem þýðir að meðalveiði per dag er uppá ca 15 laxa þessa daga sem Blanda er búin að vera opin. Þess má geta að af þessum 250 löxum er innan við 10 laxar sem má kalla smálaxa. Síðasti sólahringur gaf 25 laxa og í morgun byjuðu menn að sjá fyrstu smálaxana
22.6.2010
Samkvæmt nýjustu fréttum var Þorsteinn Hafþórsson, einn af leiðsögumönnum okkar í Blöndu rétt í þessu að kíkja á teljarann í laxastiganum við Ennisflúðir. Samkvæmt honum hafa 160 laxar þegar gengið í gegnum teljarann og upp á efri svæðin. Reynslan sýnir að hluti laxa fer þó flúðirnar fremur en að fara stigann, rannsóknir hafa sýnt að rúmlega 20% af stofninum fara upp flúðirnar. Laxinn sem fer flúðirnar er nánast undantekningalaust 2ja ára lax, það eru því mjög góðar líkur á því að fjöldi laxa á efri svæðunum sé talsvert meiri en 160. Það má því búast við því að líf fari að færast í tuskurnar á svæðum 2, 3 og 4 í Blöndu á allra næstu dögum!
25.6.2010
Veiðimenn sem voru við veiðar á svæði 4 í Blöndu lönduðu 5 löxum á einum degi. Þar af voru fjórir 80 cm langir. Greinilega eru stórlaxinn er mættur þarna uppeftir, eins og vanalega, og má búast við fjörugu sumri.
29.6.2010
Blanda heldur áfram á fullri siglingu þessa dagana. Svæði 1 er nú komið í 350 laxa, en síðustu viku voru menn eingöngu að veiða á flugu. Við heyrðum í veiðimönnum sem voru með 2 stangir seinni vaktina í gær og löndu 37 löxum, þeir sögðust hafa tekið því rólega eftir klukkan 8:30. Einnig er vert að minnast á að 1 árs laxinn virðist vera að stimpla sig inn og ganga nú fleiri tugir laxa í gegnum laxastigann á hverjum degi. Menn gætu farið að lenda í mjög góðri veiði á svæðum 2 og 3. Eins má gera ráð fyrir því að Svartárlaxinn sé farinn að ganga upp í ármótin og ofar.
Bestu kv stefan@lax-a.is
.JPG)
.jpg)
