Fréttasafn
Gallar á reglugerð? Of algengt að menn skjóti Fálka og Erni
Ríflega fimmti hver örn og fjórði hver fálki sem fundist hafa dauðir hér á landi hafa verið skotnir samkvæmt rannsókn Náttúrufræðistofnunar. Ernir og fálkar eru á válista og algjörlega friðaðir, örninn frá 1914 og fálkinn frá 1940. Stofnunin hefur rannsakað hræ friðaðra fugla sem fundist hafa á undanförnum árum.
Löggjöf um varðveislu og uppstoppun friðaðra fugla og verslun með þá sé gölluð og því erfitt að koma böndum á þessa ólöglegu iðju. Rótgróin óvild fámenns hóps í garð arnarins eigi hér einnig hlut að máli og fégræðgi þeirra sem höndli með friðaða fugla. Af 23 örnum sem krufnir voru reyndust 5 hafa verið skotnir og af 68 fálkum höfðu 18 verið skotnir, þar af var einn með 26 högl.
Á heimasíðu Náttúrufræðistofnunar segir að um áratugaskeið hafi verið óheimilt að stoppa upp fálka, nema fyrir opinber náttúrugripasöfn. Með reglugerð sem sett var árið 1996 opnaðist leið fyrir þá sem finna dauða fálka að láta stoppa þá upp fyrir sig, að því tilskyldu að viðkomandi skilaði fuglinum áður til rannsókna á Náttúrufræðistofnun. Þrátt fyrir blátt bann við verslun með slíka fugla sé vitað að slík viðskipti hafi verið reynd.
Stofnunin segir nauðsynlegt að stjórnvöld loki fyrir þessa gátt og jafnframt þurfi að kveða á um með skýrum hætti í löggjöfinni að öll verslun með uppstoppaða strangfriðaða fugla sé bönnuð.
![kertasnikir[1]](/media//small/kertasnikir[1].jpg)
![pottaskefill[1]](/media//small/pottaskefill[1].jpg)
