---

Púlsinn tekinn á veiðimönnum - Spurning hvort þetta var heppni..?

26.5.2010

Hver er veiðikonan?

Guðrún S Ólafsdóttir 47 ára Kópavogsbúi með brjálaða veiði-og útivistardellu.

..Hvar og hvenar hófst þinn veiðiskapur?

Það var að mig minnir í Heiðarvatni í Mýrdal. Þar sem ég er fædd og uppalin í Vík í Mýrdal fór ég þó nokkrum sinnum með foreldrum mínum þangað að veiða. Þegar ég varð eldri fór ég með Hjölla bróður og stundum með strákunum í Vík að æfa okkur að skjóta, þá ýmist með Haglabyssu eða Riffli.

..Ég hef heyrt skemmtilegar sögur af því þegar þú tókst Maríulaxinn í Grímsá, segðu mér aðeins frá því?

Ég var í góðra vina hópi. Við vorum með leiðsögumann með okkur. Í nokkurn tíma kastaði ég undir hans leiðsögn en ekkert gekk. Um leið og hann fór valdi ég mér nýja flugu, setti hana sjálf á og eftir eitt til tvö köst þá var laxinn á.

Spurning hvort þetta var heppni !

 

..Fara konur saman í veiði eins og við karlmenn? Eru þær að  haga sér eins og karlpeningurinn þegar í veiði er komið? Maður hefur heyrt margar sögur en ekki fengið neitt staðfest J?

Hmmm.... eins og maðurinn sagði það sem gerist í veiðiferðum er og verður þar. Ég get lofað þér því að við toppum ykkur.

..Nú fórst þú á Hreindýraveiðar, hvernig var sú upplifun? Fannst þú villimanninn í þér og sérðu þig fara erlendis til að skjóta stærri dýr í framtíðinni?

Já, ég hef farið á hreindýraveiðar, það var á svæði 2 ekki langt frá Kárahnjúkum. Það var mun auðveldara en ég reiknaði með. Það kom mér reyndar á óvart hvað það er stutt í villdýrið í mér.

Já, ég væri alveg til í að fara erlendis til að skjóta. Ævintýramennska á alveg við mig.

   

..Hvernig er með almennar fuglaveiðar, ferð þú t.d.  á Rjúpnaveiðar, Gæsaveiðar, Önd?

 Veiði á fuglum heillar mig líka Ég hef gengið til Rjúpna en ekki með miklum árangri “enn þá”.

En það breytist vonandi í haust. Er búin að nauða í einum vini mínum um að fá að koma með í Gæs í haust. Vonandi verður af því.

Önd ekki spurning !

..Ef þú mættir velja eina á og  einhvern frægan til að veiða með í Lax á prime time, hvaða á myndir þú velja og hvaða frægu persónu og hvers vegna? 

Ætli að Laxá í Ásum yrði ekki fyrir valinu. Fræg persóna ! Hmmm... verð að hugsa mig um.

Er frekar lítið fyrir þessa svokölluð  frægu.  Ætli Birgitta vinkona mín yrði ekki frekar fyrir valinu. :o)

..Áttu eitthvað gott leynitrix til að deila með lesendum í annaðhvort skot eða stangveiði?

Já, slökkva á símanum, mergsjúga umhverfið og ánna inn um öll vit og njóta þess að vera úti í náttúrunni. Þá er nokkuð öruggt að sá stóri láti sjá sig.

..Fyrri viðmælandi hann Magnús, vill spyrja þig eftirfarandi spurninga?

..Ef þú yrðir að hætta að stunda golf, skotveiði eða stangveiði hvað yrði fyrir valinu og afhverju?”

Magnús !  Þessi er erfið. Trúlega yrði það skotveiðin. Sennilega út af því að veiðtímabilin eru frekar stutt, það er heppni ef maður fær úthlutað Hreindýri og Rjúpnaveiðitímabilið er óþolandi stutt.  

..Hvor er meiri veiðimaður þú eða Garðar maðurinn þinn og hvort ykkar sér um að elda villibráðina eða fiskinn á þínu heimili?”

Það er mín skoðun að ég sé betri á rifflinum og hann liðtækari á stöngina  „enn þá“.

Við vinnum vel saman í eldhúsinu. Hann gerir frábæra villibráðasósu og ég sé um steikinguna. Skiptir ekki máli með fiskinn. Hann er frábær hjá okkur báðum.

..Hvaða einstakling velur þú sem næsta viðmælanda og hvers vilt þú spyrja hann að?

Vinur minn er mikill veiðimaður hann heitir Jón Þór Gunnarsson.

"Hefur þú veitt mikið utan landsteinana og áttu þér einhverja uppáhalds á þar?" 

"Í  hvaða á hefur þú farið oftast og hvers vegna ?"

 

..Eitthvað að lokum? (heilræði, veiði, matargerð, eitthvað þessháttar)

Læt sósuna hans Garðars fylgja með fyrir þá sem borða villibráð.

½ lítri Rjómi

250 gr Rjómaostur

2 matsk Mysingur

Ca. ½ dós Oscar villibráðarkraftur

1 dós St.Dalfour  bláberjasulta ( hún er ekki með viðbættum sykri )

Svartur pipar eftir smekk

Gott að nota þurrkaða lerkisveppi úr Hallormstaðaskógi í sósuna. Má líka sleppa.

 

Takk fyrir mig og sjáumst í veiðinni í sumar.

Ég þakka Guðrúnu fyrir spjallið, heilræðin og uppskriftina, megi sumarið verða þér ánægjulegt.

Axelo axelo@lax-a.is

 

 

Til baka Senda grein Prenta greinina