Fréttasafn
Lögreglan varar við skotvopna þjófum
Lögregla hefur vísbendingar um að glæpamenn ætli sér að komast yfir skotvopn á stöðum þar sem þau eru seld eða geymd. Lögreglumenn heimsóttu fjölda sölustaða í gær, og fóru yfir öryggismál með starfsmönnum.
Lögregla fékk fyrir nokkrum dögum vísbendingar um að glæpamenn ætluðu sér að komast yfir skotvopn en rætt er um glæpagengi í þessu samhengi. Friðrik Smári Björgvinsson, yfirlögregluþjónn, sagði í samtali við fréttastofu að lögregla hefði talið ástæðu til að vekja athygli þeirra sem hafa með sölu skotvopna að gera að huga að sínum öryggismálum. Það var gert í gær á öllu landinu. Lögreglumenn ýmist heimsóttu sölustaði eða höfðu samband við ábyrgðarmenn, ekki aðeins í verslunum, heldur einnig í innflutningsfyrirtækjum og ræddu einnig við byssusafnara sem eru ófáir hér á landi.
30 fyrirtæki hafa leyfi hér á landi til að selja skotvopn, og strangar öryggisreglur gilda um þá staði, til dæmis er þeim gert skylt að vera tengdir við öryggismiðstöðvar. Lögregla ræddi einnig við þau fyrirtæki í gær. Samkvæmt upplýsingum fréttastofu eru áhöld um hversu áreiðanleg vísbendingin er sem barst til lögreglu, en málið var hins vegar metið það alvarlegt að ástæða væri til að grípa til aðgerða. Ekki væri hægt að útiloka að um glæpagengi væri að ræða, sem ætluðu sér að komast yfir skotvopn með ólöglegum hætti.
Frétt af ruv.is
.JPG)
.jpg)
